जाजरकोट
कर्णाली प्रदेश अन्तगरत जाजरकोट जिल्लाको उत्तरी भेगमा रहेको बारेकोट गाउँपालिका–४ जिरी स्थित निर्मानाधिन ‘रक गोर्डेन’ ले आन्तरिक पर्यटक तान्न थालेको छ । रक गार्डेनको प्रचारप्रसार गर्न सके पर्यटकीय स्थलको रूपमा विकास हुने देखिएको छ ।
प्राकृतिक रूपमा रहेको चट्टान आफैं गार्डेन जस्तै बनेर बसेको छ । प्राकृतिक सौन्दर्यताप्रति रुची राख्ने र रमणीय, फरक खालको ठाउँमा घुम्न चाहने पर्यटकलाई उक्त गोर्डेनले आकर्षित गर्दै तान्न थालेको हो ।
सुन्दरताको खानी ‘रक गोर्डेन’ पहरै पहराले बनेको छ । कतै गुफा छन्, कतै ओढार । मनै लोभ्याउने ‘रक गोर्डेन’ हेर्न तथा अवलोकन गर्नलाई एक घण्टाभन्दा बढी समय लाग्छ । रक गार्डेन घुम्न जाने मानिसहरू चट्टानको बनावट र त्यहाँको वातावरणमा प्रफुल्लित हुन्छन् । चिसो वातावरण र लालिगुरास फुलेको समय राताम्य देखिने ढुंगाको बगैंचा वरिपरिको सुन्दर दृश्य ले त्यहाँ घुम्न जाने मासिनसहरू आनन्दित हुने गरेका छन् । रकगार्डेनमा स्थानीय तथा आन्तरिक पर्यटकहरू आउन थालेका छन् । प्राकृतिक रूपमा बनेको ढुंगाको प्रचार प्रसार र विकासमा ध्यान दिन सकेमा बारेकोट गाउँपालिकाको महत्वपुर्ण पर्यटकीय स्थलको रूपमा विकास गर्न सकिने बारेकोट गाउँपालिका वडा नम्बर ४ का वडा अध्यक्ष बिष्णु बहादुर रावतले बताए । अहिलेपनि पालिकाभित्रका मानिसहरू दैनिक रूपमा घुम्न आउने गरेका छन् ।
यस स्थानबाट बारेकोट गाउँपालिकाका, विभिन्न गाउँ बस्तीहरु अवलोकण गर्न सकिन्छ । प्रकृतिले आफैं निर्माण गरेको यो क्षेत्र साँच्चिकै मनमोहक रहेको छ । प्राकृतिक सुन्दरताले भरिपूर्ण रक गोर्डेनमा नरमाउने त सायदै कमै होलान् । प्राय रकगार्डेन हेर्न पुग्नेहरु भन्छन् “घुम्नका लागि पुग्नैपर्ने ठाउँ रहेछ रक गार्डेन । यहाँ पहाडी तथा ग्रामीण भेगका पर्यटकभन्दा अझ बढी शहर बजार र तराईतिरको पर्यटकका लागि एकदम उत्तम रहे छ । यहाँ खान बस्न र रमाइलो गर्नका लागि उचित ब्यबस्था भए ‘रक गार्डेन’ ले आन्तरिक मात्र नभई बाह्य पर्यटक तान्न सक्ने सम्भावना रहेको यहाँ घुम्न आएका पर्यटक बिजय राज पुनले भने । रक गार्डेन पर्यटकीय हिसाबले निकै सम्भावना भएकोले यहाँ ब्यबस्थित होमस्टे हुनुपर्ने यहाँ घुम्न आउनेहरुको माग रहेको छ ।
पर्यटकलाई आकर्षित गर्न रक गार्डेनलाई अझै थप व्यवस्थित बनाउनको लागि रक गार्डेनको स्तर उन्नतीका काम भइ रहेको निर्माण समितिका अध्यक्ष शक्ति बहादुर रावततले बताए । हालसम्म ३० लाख लागत रक गार्डेनमा खर्च भएको समितिका अध्यक्ष रावतले बताए । गार्डेनभित्रै शौचायल खानेपानी लगायत संरचना निर्माण भइ रहेका छन् । गार्डेनसँगै घरवास (होमस्टे) को अवधारणा पनि अघि बढाइएको वडा अध्यक्ष रावतले बताए । ढुंगाको जंगल जस्तै देखिने यस स्थानको प्रचारप्रसार गर्न सके यो एउटा जाजरकोटकै प्रमुख पर्यटकीय स्थलको रूपमा विकास हुन सक्छ ।
