News Portal

जाजरकोटको कुशेमा खानतलास गरि बटुवा माथि आतंक सिर्जना

डिजिटल संचार संवाददाता२०८१ फाल्गुण १२
१९९ पटक

जाजरकोट
कुशे गाउँपालिका–५ खुर्पाखोलामा बाटोमा हिडिरहेका बटुवाको खानतलासी गरि आतंक सिर्जना गरिएको छ । सोमबार बिहान ११ बजेतिर अज्ञात व्यक्तिले बाटोमा हिडिरहेका बटुवालाइ खानतलास गरि आतंक सिर्जना गरेका हुन् ।

घरबाट खलंगा तर्फ मोटरसाइकलमा आउदै गरेका कुशे गाउँपालिका–९ निवासी नविन कुमार सिंहलाइ खुर्पाखोलामा रोकेर अपरिचित दुइ जनाले खानतलास गरेका छन् । नेपाल प्रहरीको परिचय दिएका उक्त दुबै जनाले मुखमा मास्क लगाएको नविन कुमार सिंहले जानकारी दिएका छन् । कालो रंगको कपडा लगाएका अपरिचत दुवै जनाको बोली तराइबासीको जस्तो रहेको सिंहले बताए ।

आफ्नै रफतारमा मोटरसाइलमा यात्रा गरिरहेको अबस्थामा एक्कासी अगाडी आएर दुइ जनाले रोकेको सिंहले जानकारी दिए । कुनै समस्या परेर रोकेका होलान भन्ने ठानेर मोटरसाइकल रोक्न वित्तिकै आफ्नो पुरै शरिर खानतलास गरेको सिंहले बताए । मेरो पासमा कुनै केही पनि थिएन सिंहले भने, ‘मेरो गोजीमा रुपैया पनि थिएन्, केही नपाएपछि मलाइ छोडिदिए, छोडेपछि मोटरसाइकल चलाएर म खलंगा पुगे ।’

प्रहरीको परिचय दिएका व्यक्तिहरुको पहिचान गर्न सिंहले बाटोबाटै जिल्ला प्रहरी कार्यालयमा सम्पर्क गर्दा प्रहरी कार्यालयबाट त्यसरी कुनै पनि प्रहरीलाइ परिचालन नगरिएको जिल्ला प्रहरी कार्यालय, जाजरकोटले जानकारी दिएको सिंहले बताए । खलंगा पुगेपछि जिल्ला प्रहरी कार्यालयमा पुगेर आफुले ती अपरिचित व्यक्तिको हुलियाँ जिल्ला प्रहरी कार्यालयमा दिएको सिंहले जानकारी दिएका छन् । आतंक सिर्जना गर्ने ती अपरिचित व्यक्तिबाट सचेत रहन तथा सजक बन्न सिंहले सबैलाइ आग्रह गरेका छन् ।

प्रतिकृया दिनुहोस्