जाजरकोट
भुकम्पको पुनर्निर्माण काममा भेरी नगरपालिकाका वडा अध्यक्ष तथा कार्यपालिका सदस्यहरु जिम्मेवार बन्न नसकेको भेरी नगरपालिकाका प्रमुख चन्द्र प्रकास घर्तीले बताएका छन् । सुक्रबार पत्रकार सम्मेलनको आयोजना गरेर नगरप्रमुख घर्तीले यस्तो बताएका हुन् ।
भुकम्प पुनर्निर्माणको कामलाइ अगाडी बढाउन नगरपालिकाले आयोजना गरेको दुइ वटा कार्यपालिका बैठकलाइ वडाअध्यक्ष र कार्यपालिका सदस्यहरुले बहिस्कार गरेको प्रमुख घर्तीले बताए । ‘हामीले कार्यपालिकाको बैठकको आयोजना गरेका र्छौ, उहाँहरूले बहिष्कार गर्नु भएको छ’ घर्तीले भने, ‘अहिले महत्त्वपूर्ण काममा लम्किने वेला आएको छ, भूकम्पपछिको पुनर्निर्माणमा जाने वेला भएपनि उहाँहरू विभिन्न बहाना गरिरहनु भएको छ ।’
पटक–पटक कार्यपालिका बैठकको आयोजना गरे पनि उहाँहरू आउनुभएको छैन्, प्रमुख घर्तीले थपे, भूकम्पछिको विस्तृत क्षतिको आङ्कलन (डिडिए) गरेर पुनर्निर्माणमा जाने वेला भए पनि उहाँहरू कार्यपालिकाको बैठकमा समेत नआउनु दुःखद कुरा भएको प्रमुख घर्तीले बताए । ‘बहुमत कार्यपालिका सदस्य जनताको पक्षमा निर्णय गर्न खोज्दा अस्वीकार गर्नुहुन्छ, उहाँहरूले जनताको पक्षमा काम गर्ने वातावरण सिर्जना गर्नुभएकै छैन, उनले थपे, ‘जनताको पक्षमा काम गर्ने जनप्रतिनिधि नखोजेर अहिले आम वडावासीले दुःख पाई रहनुभएको छ ।’ अहिले जनताको पक्षमा काम गर्ने वेला भएको र नगरपालिकामा राजनीतिक षडयन्त्र नगर्न प्रमुख घर्तीले आग्रह गरे ।
अबको कार्यपालिका बैठकमा सबैलाई उपस्थिति हुन प्रमुख घर्तीले आह्वान गरेका छन् । गत निर्वाचनमा भेरी नगरपालिकामा नेकपा एमालेले नगरप्रमुख र एक जना वडाध्यक्ष मात्रै जितेको छ । अन्य उपप्रमुख र वडाध्यक्ष नेपाली काँग्रेस र नेकपा (माओवादी केन्द्र) ले जितको छ । उप प्रमुख र वडाध्यक्षहरूले नगरप्रमुख र प्रमुख प्रशासकीय अधिकृतले एकलौटी गर्ने गरेको आरोप लगाउँदै आएका छन् ।
