जाजरकोट
जाजरकोट जिल्लामा एचपिभी खोप राष्ट्रिय अभियान–२०८१ को विधिवत शुभारम्भ गरिएको छ । स्वास्थ्य सेवा कार्यालय जाजरकोटको आयोजनामा विधिवत रुपमा एचपिभी खोप राष्ट्रिय अभियान–२०८१ को शुभारम्भ गरिएको हो ।
भेरी नगरपालिका–१३ कुदु स्थित भगवति माध्यामिक विद्यालयमा मंगलबार एचपिभी खोप राष्ट्रिय अभियान–२०८१ को शुभारम्भ गरिएको थियो । जिल्ला खोप समन्वय समितिको अध्यक्ष तथा जिल्ला समन्वय समिति, जाजरकोटका उपप्रमुख दल बहादुर सिंहको अध्यक्षतामा आयोजना गरिएको एचपिभी खोप राष्ट्रिय अभियान–२०८१ को शुभारम्भ कार्यक्रममा खोप अभियान सफलताको शुभकामना मन्तव्य भेरी नगरपालिकाका कावा प्रमुख सिता जैसी, प्रमुख जिल्ला अधिकारी मेखबहादुर मंग्राती, खोप अभियानको अनुगमन तथा मुल्याङ्कण गर्न जाजरकोट पुगेका स्वास्थ्य सेवा निर्देशनालय कर्णाली प्रदेशका प्रतिनीधि चन्द्रा आचार्यले राखेका थिए । एचपिभी खोप सम्बन्धि नेपाल सरकारको राष्ट्रिय अभियानको आबश्यकता र महत्वको बिषयमा स्वास्थ्य सेवा कार्यालयका व्यवस्थापक डा. सुनिल पुनले प्रकाश पारेका थिए ।
भेरी नगरपालिकाको समन्वयमा एचपिभी खोप राष्ट्रिय अभियान–२०८१ को शुभारम्भ कार्यक्रमको आयोजना गरिएको थियो । कार्यक्रमको संचालक तथा नगर स्वास्थ्य शाखा प्रमुख दिपक ओलीले नेपालमा हरेक दिन पाठेघरको मुखको क्यान्सरका कारण ४ जनाको मृत्यु हुने गरेको बताएका थिए । गत बर्ष मात्र भेरी नगरपालिकामा क्यान्सका कारण ६ जनाको मृत्यु भएको भनाइ राखेका थिए ।
आजदेखि देश व्यापी रुपमा शुभारम्भ गरिएको एचपिभी खोप राष्ट्रिय अभियान–२०८१ अन्तरगत भेरी नगरपालिकाका २ हजार ६१३ जना किशोरीलाइ पाठेघरको मुखको क्यान्सर विरुद्ध एचपिभी खोप लगाउने लक्ष्य लिएको बताएका थिए । जिल्लाका सात वटै स्थानीय तहका १५ हजार किशोरीलाइ खोप लगाउने जिल्लाको लक्ष्य रहेको छ ओलीले भने, ‘कर्णाली प्रदेशमा एक लाख किशोरीलाइ यो खोप लगाउने लक्ष्य राखिएको छ भने, देशभरी १६ लाख किशोरीलाइ यो खोप लगाउने लक्ष्य राखिएको छ ।’
“स्थानीय स्रोतको उपयोग, स्वामित्व र सहभागिता, पूर्ण खोप सुनिश्चितता– हाम्रो प्रतिवद्धता ।” भन्ने मुल नारा सहित विश्व क्यान्सर दिवसको अबसरमा शुभारम्भ गरिएको एचपिभी खोप राष्ट्रिय अभियान–२०८१ अन्तरगत भेरी, नलगाड नगरपालिका र शिवालय, बारेकोट गाउँपालिकामा आज २२ गतेदेखिनै एचपिभी खोप अभियानको सुरुवात गरिएको छ भने, जुनीचाँदे गाउँपालिकामा यही माघ २५ गतेदेखि खोप अभियान संचालन गर्ने तयारी गरिएको छ । त्यसैगरी छेडागाड नगरपालिका र कुशे गाउँपालिकामा यही माघ २७ गतेदेखि एचपिभी खोप अभियान संचालन गर्ने तयारी गरिएको स्वास्थ्य सेवा कार्यालय, जाजरकोटले जनाएको छ ।
विद्यालयमा ६ कक्षादेखि १० कक्षासम्म अध्ययनरत किशोरी र विद्यालय भन्दा बाहिर रहेका १० देखि १४ बर्ष उम्मेर समुहका किशोरीहरुलाइ लगाइने एचपिभी खोप निशुल्क लगाइने, जीवन सुरक्षा लगाइने खोप सुरक्षित रहेको विश्व स्वास्थ्य संगठनले बताएको छ ।
