जाजरकोट
जाजरकोटको पैंक केन्द्रविन्दु बनाएर गएराति गएको भुकम्पबाट तीन जना घाइते भएका छन् । राति ८ बजेर १० मिनेटको समयमा गएको भुकम्पको त्रासले घरबाट भाग्ने क्रममा जाजरकोटका तीन घाइते भएका हुन् ।
५.५ रेक्टरको भुकम्प आएको वेला भेरी नगरपालिका–२ रिसाङ निबासी ओपेन्द्र कार्कीको ४९ बर्षिय श्रीमति कमला कार्की घरबाट भाग्ने क्रममा छाती र दाहिने हातमा चोट लागेर घाइते भएको जिल्ला प्रहरी कार्यालय, जाजरकोटले जानकारी दिएको छ । जिल्ला अस्पताल जाजरकोटमा प्राथमिक उपचारपछि कार्कीलाइ डिस्चार्ज गरिएको प्रहरीले बताएको छ । त्यसैगरी भेरी नगरपालिका–४ का ३४ बर्षिय सुरेश श्रेष्ठ घरबाट भाग्ने क्रममा बाँया हातमा चोट लागेको जिप्रका जाजरकोटले जानकारी दिएको छ । उनको बाँया हातमा चार वटा टाँका लगाएर घर परिर्कएको प्रहरीले बताएको छ ।
नलगाड नगरपालिका–१२ का २२ बर्षिय बिरेन्द्र भण्डारी घरबाट भाग्ने क्रममा दाहिने खुट्ठामा चोट लागेर घाइते भएको जिप्रका जाजरकोटले जानकारी दिएको छ । भण्डारीलाइ स्थानीय मेडिकलमा उपचार पश्चात घर फर्किएको प्रहरीले जानकारी दिएको छ ।
त्यसैगरी गएराति गएको भुकम्पले भेरी नगरपालिका–१० निवासी कमला गोसाइको एकतले पक्की घरको पश्चिम तर्फको कोठाको भित्री पर्खाल भत्किएको जिल्ला प्रहरी कार्यालय प्रमुख प्रहरी नायव निरिक्षक पुरुषोतम प्रसाद पाण्डेले जानकारी दिएका छन् । सुक्रबार राति ८ बजेपछि तीन मिनेटको अन्तरमा दुइ पटक भुकम्प गएको थियो । ८ बजेर ७ मिनेटको समयमा ५.२ म्याग्निच्युटको भुकम्प गएको थियो भने, ८ बजेर १० मिनेटको समयमा ५.५ म्याग्निच्टको भुकम्प गएको राष्ट्रिय भुकम्प मापन केन्द्रले जानकारी दिएको छ । उक्त भुकम्पको धक्का कर्णाली, सुदरपश्चिम, बागमती, लुम्बिनी प्रदेशका विभिन्न जिल्लामा महसुस गरिएको थियो ।
