जाजरकोट
भेरी नगरपालिका र नलगाड नगरपालिकाका पाँच हजार भन्दा बढि बालबालिकालाइ ट्रयाकसुट बितरण गरिएको छ । पाँचतारा युवा संरक्षक मञ्च, जाजरकोट र वल्र्डभिजन इन्टरनेशनल नेपालको साँझेदारीमा भेरी र नलगाड नगरपालिकाको समन्वयमा संचालित समुदायिक संलग्नता बाल स्पोन्सरसिप परियोजनाले भेरी र नलगाड नगरपालिकाका पाँच हजार भन्दा बढि बालबालिकालाइ ट्रयाकसुट बितरण गरेको हो ।
समुदायिक संलग्नता बाल स्पोन्सरसिप परियोजनाले भेरी नगरपालिकाका ३ हजार ४० र नलगाड नगरपालिकाका २ हजार २६० जना बालबालिका गरी जम्मा ५ हजार ३०० बालबालिकालाइ ट्रयाकसुट बितरण गरिएको परियोजना संयोजक वीरेन्द्र थारुले जानकारी दिए । वडा स्तरीय बालअधिकार समितिको सिफारिसमा स्पोन्सरसिप परियोजनामा दर्ता बालबालिकालाइ ट्रयाकसुट बितरण गरेका छौं परियोजना संयोजक थारुले भने, ‘जोखिममा रहेका बालबालिकाहरुलाई ट्रयाक सुट वितरण गरेका छौं ।’
परियोजनाले ५ हजार ३०० जना बालबालिकालाई प्रति व्यक्ति ५०० का दरले जम्मा २६ लाख ५० हजारको लागतमा ट्रयाक सुट वितरण गरिएको पाँचतारा युवा संरक्षक मञ्च, जाजरकोटका अध्यक्ष छवी पन्तले जानकारी दिए । भेरी नगरपालिकाको वडा नं. ६ देखि १२ सम्म र नलगाड नगरपालिकाको वडा नं. १ देखि ७ सम्ममा परियोजनाले बालबालिकाको समृद्धिको लागि विभिन्न कार्यक्रम संचालन गर्दे आएको छ । पाँचतारा युवा संरक्षक मञ्च, जाजरकोटले बालबालिकाहरुको समृद्धि तथा बाल सरोकारका विषयमा गरेको काम असध्यै सराहनीय रहेको भेरी नगरपालिका–८ का वडा अध्यक्ष बीर बहादुर चन्दले बताए ।
२०५३ सालमा जिल्ला प्रशासन कार्यालय जाजरकोटमा विधिवत रुपमा दर्ता भएको पाँचतारा युवा संरक्षक मञ्चले विगत २८ बर्ष देखि कर्णाली प्रदेशको दुर्गम जिल्ला जाजरकोटका युवा, समाजसेवी, स्वयंसेवकहरुले दुरदराज तथा ग्रामीण बस्तीहरुमा रहेका समुदायको समुन्नत एवं दिगो विकासका लागि सामाजिक परिचालन, भौतिक पूवाधार निमार्ण, विपद् जोखिम व्यवस्थापन, कृषि, पशु पालन, बाल संरक्षण, महिला विकास, स्वास्थ्य तथा सरसफाई सामाजिक रुपान्तरण, शैक्षिकस्तरमा बृद्धि गरी समाजलाई दिगो रुपमा सकारात्मक परिवर्तन गर्ने उदेश्यले विभिन्न कार्यक्रमहरु संचालन गर्दै आईरहेको छ ।
