जाजरकोट
जाजरकोटमा समावादी मोर्चा जिल्ला संयोजन समितिको घोषणा गरिएको छ । नेकपा (माओवादी केन्द्र), नेकपा (एकीकृत समाजवादी) र विप्लव नेतृत्व रहेको नेकपा बीचको बैठकबाट निर्माण गरिएको समाजवादी मोर्चा जिल्ला संयोजन समितिलाइ आइतबार विचार गोष्ठीको आयोजना गरेर घोषणा गरिएको थियो ।
घोषणा कार्यक्रममा ‘नेपाली बिशेषताको समाजवाद र समाजवादी मोर्चा’ विषयक अन्तरक्रिया कार्यक्रमको आयोजना गरिएको थियो । तीन पार्टीको संयुक्त बैठकबाट गठन गरिएको समाजवादी मोर्चा जिल्ला संयोजन समितिको नामावली नेकपा (माओवादी केन्द्र) का केन्द्रीय सदस्य तथा जाजरकोट जिल्ला सह–इन्चार्ज गणेश प्रसाद सिंहले पढेर घोषणा गरेका थिए । मोर्चाको जिल्ला संयोजन समितिको संयोजक नेकपा (एकीकृत समाजवादी) जाजरकोट अध्यक्ष दिपबहादुर थापा रहेका छन् । थापाको संयोजकत्वमा ६ सदस्यीय जिल्ला संयोजन समिति गठन गरिएको छ । अन्य सदस्यहरुमा नेकपा (माओवादी केन्द्र) जिल्ला सचिव ईमाश्वर देवकोटा, प्रेमबहादुर खत्री, रहेका छन भने, नेकपाका जिल्ला सेक्रेटरी सूर्यकिरण सी, विराजन सी रहेका छन् । त्यसैगरी नेकपा (एस) जिल्ला सचिव मानबहादुर बुढा सदस्य रहेका छन् । समाजवादी मोर्चा नेपालको कार्यविधिले गरेको व्यवस्था अनुसार जिल्ला संयोजन समितिको संयोजक आलोपालो प्रणाली लागु गरेर संचालन गर्ने बताइएको छ ।
रसियन र चिनियाँ मोडेल भन्दा फरक तरिकाले नेपालमा जनवादी क्रान्ति सम्पन्न भएको नेकपा (माओवादी केन्द्र) का केन्द्रीय सदस्य गणेश प्रसाद सिंहले भनाइ राखेका थिए । विचार गोष्ठीमा आफ्नो धारणा राख्दै केन्द्रीय सदस्य सिंहले यो समाजवादी मोर्चा, मोर्चामा मात्र सिमित नभएर पार्टी एकताको उचाइ हासिल गर्नुपर्ने भनाइ राखेका थिए ।कार्लमाक्र्सले समाज विकासका चरणहरुलाइ आदिम साम्यवादी युग, दास युग, सामान्ति युग, पुजीवादी युग, समाजवादी युग र समाजवादी युगको विकसित रुप साम्यवादी युगका रुपमा व्याख्या गरेको नेकपा (एस) का केन्द्रीय सदस्य कृष्ण बिसीले भनाइ राखेका थिए । समाज विकासका ५ चरणका विषयमा कार्लमाक्र्सले व्याख्या गरे जस्तै नेपालले पनि समाज विकासका पाँच चरणलाइ पुरा गरिसकेको विसीको भनाइ रहेको थियो । अबको विचार बहस समाजवाद केन्द्रीत हुनुपर्ने बताउदै विसीले नेपाली बिशेषताको समाजवादको मोडेलका विषयमा राजनीतिक विचारकहरुले चर्चा गर्न आबश्यक रहेको भनाइ राखेका थिए ।
समाजवादको फ्रेम भन्दा बाहिर नेपालका कुनैपनि पार्टी नरहेको नेकपाका केन्द्रीय सदस्य केवी मल्लले भनाइ राखेका थिए । समाजवादको बहस प्रतिपक्ष विहिन बहस भएको बताउदै केन्द्रीय सदस्य मल्लले समाजवाद भन्दा बाहिरको बहस गर्ने नेपालमा सिके रावतको नागरिक उन्मुक्ति पार्टी रहेको बताए । नागरिक उन्मुक्ति पार्टीले लोक कल्याणकारी राज्य भनेता पनि समाजवादकै अन्धनक्ल भएको केन्द्रीय सदस्य मल्लले भनाइ राखेका थिए । जनताको मनोविज्ञानलाइ आकर्षित गर्न नेपालका सबै पार्टीले समाजवादी व्यवस्थालाइ गन्तव्य स्थल बनाएको उनले भनाइ राखेका थिए । जीवन व्यवहारमा लागु गर्ने गरि समाजवादको मोडल निर्माण गर्नुपर्ने मल्लले धारणा राखेका थिए ।
नेपालका कम्युनिष्ट पार्टीहरुमा विद्रोही विचार र क्रान्तिकारी दृष्टिकोण हराउदै गएको नेकपा (एस) का केन्द्रीय सदस्य कमान बहादुर खड्काले भनाइ राखेका थिए । एउटा उदेश्य पुरा गरिसकेपछि अर्को चरणलाइ पार गर्नका लागि आउनुपर्ने जोस आउन नसकेर नेता कार्यकर्ताहरुले थकानको महसुस गरिरहेको भनाइ राखेका थिए ।
दिप बहादुर थापाको अध्यक्षतामा संचालन गरिएको विचार गोष्ठी कार्यक्रमको संचालन विराजन सीले गरेका थिए भने, स्वागत भाषण ईमाश्वर देवकोटाले गरेका थिए । उक्त विचार गोष्ठीमा नेकपा (माओवादी केन्द्र) का केन्द्रीय सदस्य यज्ञ बहादुर खत्री, नागरिक समाज जाजरकोटका संयोजक राजेन्द्र विक्रम शाह र पत्रकार दिप बहादुर घर्तीले पनि आ–आफ्नो धारणा राखेका थिए ।
