जाजरकोट
नलगाड नगरपालिकाको दल्लीमा विभिन्न कार्यक्रमको आयोजना गरेर ११५ औं अन्तर्राष्ट्रिय महिला दिवस मनाइएको छ । नलगाड नगरपालिकाको आयोजनामा विभिन्न कार्यक्रमको आयोजना गरेर ११५ औं अन्तर्राििष्ट्रय महिला दिवस मनाइएको हो ।
महिला सम्वाद तथा अन्तरक्रिया, खुल्ला वक्तृत्वकला प्रतियोगिता, विभिन्न मनोरन्जनात्मक कार्यक्रमको आयोजना गरेर ११५ औं अन्तर्राष्ट्रिय महिला दिवस मनाइएको नलगाड नगरपालिकाको महिला, बालबालिका तथा जेष्ठ नागरिक शाखा प्रमुख ज्योति रावलले जानकारी दिइन् । शाखा प्रमुख रावलले दिएको जानकारी अनुसार महिला अधिकार समानता र सशक्तिकरणमाः स्थानीय तहको भुमिका बिषयक खुल्ला वक्तृत्वकला प्रतियोगिता आयोजना गरिएको थियो । उक्त प्रतियोगितामा एकता उपाध्यायले ७२.९ नम्बर प्राप्त गरेर प्रथम स्थान हासिल गरेकी थिइन् । त्यसैगरी वक्तृत्वकला प्रतियोगितामा ६५.६ नम्बर ल्याएर डिलसरा सुनारले द्धितीय स्थान हासिल गरेकी थिइन् । ६३ नम्बर प्राप्त गरेर कमला खड्काले तृतीय स्थान हासिल गरेकी थिइन् भने, ६० नम्बर प्राप्त गरेर कल्पना विक र यसोदा थापाले सान्त्वना स्थान हासिल गरेकी थिइन् ।
महिला सशक्तिकरण सम्भावना, चुनौति र समधानका विषयमा जनप्रतिनीधिसंग महिला सम्वाद तथा अन्तरक्रिया कार्यक्रमको आयोजना गरिएको थियो । अन्तरक्रिया कार्यक्रममा जनप्रतिनीधि, महिला अभियान्ता, महिला सशक्तिकरणका क्षेत्रमा कार्यरत संघ÷संस्थाका प्रमुख तथा प्रतिनीधिहरुले भाग लिएका थिए ।
चर्चित लोक दोहरी गायिका तार्मी मगर, नृत्यकार निशा गिरीको सहभागिता र संलग्नतामा विभिन्न मनोरञ्जनात्मक साँस्कृतिक कार्यक्रमको आयोजना गरिएको शाखा प्रमुख रावलले जानकारी दिइन् ।
नलगाड नगरपालिकाका उप–प्रमुख देवका लामिछानेको अध्यक्षतामा आयोजना गरिएको औपचारिक कार्यक्रमको प्रमुख अतिथि रुकुमपश्चिमको आठबीसकोट नगरपालिकाका प्रमुख रवी केसी रहेका थिए भने, विशेष अतिथि नलगाड नगरपालिकाका प्रमुख डम्बर बहादुर रावत रहेका थिए । त्यसैगरी अन्य अतिथिहरुमा नलगाड नगरपालिकाका प्रमुख प्रशासकीय अधिकृत शेर बहादुर पुन, अनेमसंघ (क्रान्तिकारी) जाजरकोट अध्यक्ष राममाया शाही हमाल लगाएतका अतिथिहरु रहेका थिए ।
