कोभिड–१९ संक्रमणको रोकथाम तथा जोखिम न्यूनीकरण गर्न नेपाल प्रहरीले देश व्यापी रुपमा ‘तपाईंको मास्क खोई ?’ कार्यक्रम संचालन गरेको छ । नेपाल प्रहरीले संचालन गरेको ‘तपाईंको मास्क खोई ?’ कार्यक्रम अन्तरगत पछिल्लो २४ घण्टामा १२ हजार ५ सय ६५ जनालाई निःशुल्क मास्क वितरण गरेको छ ।
नेपाल प्रहरीले ‘तपाईंको मास्क खोई ?’ कार्यक्रम गत वैशाख ६ गतेदेखि संचालन गरेको हो । गत बैसाख ६ गते देखि हालसम्म नेपाल प्रहरीले जम्मा ८ लाख ३४ हजार ८ सय १७ जनालाई निःशुल्क मास्क वितरण गरेकको नेपाल प्रहरी केन्द्रीय कार्यालयले जनाएको छ ।
नयाँ भेरियन्ट सहितको कोभिड–१९ को संक्रमण बढ्दै गएपछि संक्रमणबाट सिर्जना हुन सक्ने समस्या र चुनौतीलाई ध्यान दिएर तोकिएको स्वास्थ्य सुरक्षा मापदण्डलाई कार्यान्वयन गर्न नेपाल प्रहरीले ‘संक्रमणबाट आफू बचौँ र अरुलाई पनि बचाऔँ’ भन्ने नारा सहित ‘तपाईंको मास्क खोई ?’ लगायतका विभिन्न सचेतनामूलक कार्यक्रमलाई अभियानकै रुपमा सञ्चालन गरी रहेको छ ।
कोभिड–१९ रोकथाम तथा नियन्त्रणका लागि स्थानीय प्रशासनद्वारा जारी गरिएको निषेधाज्ञा उल्लंघन गर्ने १ सय १० जना व्यक्तिलाई ११ हजार रुपैयाँ जरिवाना गरिएको छ भने, स्वास्थ्य सुरक्षा मापदण्ड उल्लंघन गर्ने ५ हजार ४ सय ३७ जनालाई सम्झाई बुझाई गर्ने काम गरिएको नेपाल प्रहरी केन्द्रीय कार्यालयले जनाएको छ । देशभर १ सय ५१ ठाउँमा माईकिङ, प्लेकार्ड, पर्चापम्प्लेट सहितको सचेतनामूलक कार्यक्रमद्धारा १६ हजार ६३ जनालाई सचेत गराइएको प्रहरी केन्द्रीय कार्यालयले जनाएको छ ।
