विश्वमै दुलर्भ वन्यजन्तु रेडपाण्डाको दुई वटा छाला सहित एक युवालाई प्रहरीले पक्राउ गरेको छ । नलगाड नगरपालिका–५ कालीमाटीबाट रेडपाण्डाका दुई वटा छाला सहित एक युवालाई प्रहरीले पक्राउ गरेको हो ।
बारेकोट गाउँपालिका–५ नायकवाडाका काले कामीका १९ बर्षिय छोरा लोकेश परियारलाई छाला सहित पक्राउ गरिएको जिल्ला प्रहरी कार्यालय, जाजरकोटले जनाएको छ । गोप्य सुचनाका आधारमा नलगाड नगरपालिका–५ कालीमाटी स्थित होटलबाट विक्रि गर्ने भनेर ल्याइएको रेडपाण्डाको छाला सहित परियारलाई पक्राउ गरिएको प्रहरी नायव उपरीक्षक मधुकुमार थापाले बताएका छन् । डिएसपी थापाका अनुसार होटल तथा सम्पुर्ण कोठाहरु खान तलासी गर्ने क्रममा उक्त होटलको माथिल्लो तलाको २ नम्वर कोठा भित्र परियारको साथमा रहेको झोला खान तलासी गर्दा झोला भित्र रेडपाण्डाको ४२ ईन्च लम्वाई भएको एउटा ठुलो छाला र टाउको नभएको २२ ईन्च लम्वाई भएको सानो छाला सहित पक्राउ गरिएको हो । पक्राउ परेको परियारलाई थप अनुसन्धान गरिरहेको र आवश्यक कार्वाहीको लागी डिभिजन वन कार्यालय जाजरकोटसंग समन्वय भई रहेको डिएसपी थापाले बताएका छन् ।
