जाजरकोटमा श्रीमतीले श्रीमानको हत्या गरेको घटना पाँच बर्षपछि बाहिर आएको छ । हत्यागरी शौचालयको खाल्डोमा राखेर पुरेको लासको मानव कङ्गाल पाँच बर्षपछि नेपाल प्रहरीले निकालेको छ । गोप्य सुचनाको आधारमा नेपाल प्रहरीले पाँच बर्षपछि हत्याको घटनालाई पत्ता लगाएको हो ।
भेरी नगरपालिका–६ सिस्नेरीका श्रीमति भद्रकला कामीले लाठी प्रहारगरी श्रीमान काले कामीको हत्या गरेको खुलेको छ । ३० पुस २०७४ को राति लोग्ने स्वास्नी बीचको बिवादमा श्रीमति भद्रकलाले लोग्ने काले कामीको टाउकोमा लाठी प्रहार गरी हत्या गरेको प्रारम्भिक अनुसन्धानबाट खुलेको जिल्ला प्रहरी प्रमुख सन्तोष निरौलाले जानकारी दिएका थिए । पत्रकार सम्मेलनको आयोजना गरेर डिएसपी निरौलाले घटना सम्बन्धि पत्रकारहरुलाई जानकारी दिएका हुन् ।
छोरा तुल्सीराम र गोविन्दको सहयोगमा भद्रकलाले लोग्ने काले कामीको हत्या गरेको खुल्न आएको डिएसपी निरौलाले बताएका थिए । काले कामीको मृत्यु पश्चात श्रीमती भद्रकला र छोरा तुल्सीराम र गोविन्दको सल्लाहमा रातिको समयमा घर नजिकै रहेको शौचालयको खाडलमा लास पुरेका थिए ।
उक्त घटना सम्बन्धि गोप्य सूचना प्राप्त गरेपछि जिल्ला प्रहरी कार्यालयबाट प्रहरी निरिक्षक सहित गएको प्रहरी टोलीले घटनास्थल पुगेर लास उत्खनन् गरेको थियो । शौचालयको खाडलबाट प्रहरी टोलीले दाँत सहितको खप्पर, प्लास्टिकको डोरीले बाँधिएको ज्याकेट, पाइन्ट, कपडाभित्र मानव हड्डी भेटिएको थियो ।
घटनाबारे आवश्यक अनुसन्धान गर्न श्रीमती भद्रकला र छोरा तुल्सीरामलाई प्रहरीले पक्राउ गरेको छ । पक्राउ परेकी भद्रकला र तुल्सीरामलाई ५ दिन हिरासतमा राखेर थप अनुसन्धान गर्न जिल्ला अदालत, जाजरकोटले म्याद दिएको डिएसपी निरौलाले जानकारी दिएका छन् । घटनासंग सम्बन्धित थुप्रै अनुसन्धान गर्न बाँकी रहेको जानकारी दिदै डिएसपी निरौलाले थप अनुसन्धानलाई प्रभावित पार्ने खालका अनुसन्धानबाट खुलिसकेका कयौं बिषयहरु सार्वजनिक गर्न नमिल्ने बताएका थिए ।
हत्या हुदाको समयमा काले कामी ४७ बर्षका थिए भने, हाल उनको श्रीमति भद्रकली ५० बर्षको भएको प्रहरीले जनाएको छ । भद्रकलीसंगै पक्राउ परेका छोरा तुल्सीरामको उम्मेर १८ बर्ष पुगेको प्रहरीले जनाएको छ । घटना हुदाको समयमा १३ बर्षका तुल्सीरामलाई हाल जिल्ला अदालतले दिएको आदेश अनुसार आमा भद्रकलीसंगै हिरासतमा राखेर अनुसन्धान भईरहेको प्रहरीले जनाएको छ । १८ बर्षिय छोरा तुल्सीराम घटनाको समयमा १३ बर्षको भएको हुदा उनलाई अपराधिका रुपमा भन्दा पनि बिजाइँका रुपमा लिनुपर्ने अधिकारकर्मीहरुको भनाई रहेको छ । बिजइँकर्ताका रुपमा रहेका तुल्सीरामको अनुसन्धानमा बाल न्यायको अबधारणा र सिद्धान्तलाई लागु गर्नुपर्ने अधिकारकर्मी निर्मला थापाको भनाई रहेको छ ।
