नेपाल प्रहरीले जाजरकोट जिल्लामा अबैध गाँजा खेती नष्ट गर्ने अभियान संचालन गरेको छ । जिल्लाका विभिन्न ठाउँको दुई सय रोपनी जग्गामा रहेको अवैध गाँजाका बोटहरु नष्ट गरेको जिल्ला प्रहरी कार्यालय, जाजरकोटले जनाएको छ ।
जिल्लाको नलगाड नगरपालिका, भेरी नगरपालिका र छेडागाड नगरपालिकाको विभिन्न ठाउँमा दुई सय रोपनी जग्गाको गाँजा खेती नष्ट गरेको जिल्ला प्रहरी कार्यालयको सुचना शाखाले जानकारी दिएको छ । गोप्य सुचनाको आधारमा नलगाड नगरपालिका–३ को द्वारे, डिम्रेनि र काँक्रेमेला लगायतका स्थानमा ३५ रोपनी जग्गामा रहेको अवैध गाँजा खेती प्रहरीले नष्ट गरिएको छ भने, छेडागाड नगरपालिका–१२ र १३ मा पर्ने चैते, टाकुरा, काँडासोती, मेलचौर, सोतीचौर, माजगाउँ लगायतका स्थानमा १५५ रोपनी जग्गामा रहेको अवैध गाँजा खेती प्रहरीले नष्ट गरेको छ । उक्त गाँजाखेती ईलाका प्रहरी कार्यालय दल्ली, ईलाका प्रहरी कार्यालय बडाबन र जगतिपुरबाट खटाईएको संयुक्त प्रहरी टोलीले नष्ट गरेको हो ।
जिल्ला प्रहरी कार्यालय जाजरकोटले दिएको जानकारी अनुसार प्रहरी चौकी पाँचकाटियामा कार्यरत प्रहरी सहायक निरिक्षक धन बहादुर सिंह ठकुरीको टोलीले भेरी नगरपालिका–२ स्थित तिमिले, छेलोहान्ने, र नाउली लगाएतका विभिन्न स्थानमा १० रोपनी जग्गामा रहेको अबैध गाँजा खेती नष्ट गरेको छ । यो भन्दा अगाडी पनि नेपाल प्रहरीले जिल्लाका विभिन्न ठाउँमा गाँजा खेती नष्ट गर्दै आएको छ ।
