बारेकोट गाउँपालिकाको लिम्सामा रहेको प्राथमिक स्वास्थ्य केन्द्रलाई स्वास्थ्य सेवा कार्यालय जाजरकोटले १० वटा अक्सिजन सिलिण्डर सहित आबश्यक औषधि दिएको छ । तिव्र रुपमा फैलिदै गएको नयाँ भेरियन्ट सहितको कोभिड–१९ का संक्रमित बिरामीहरुको उपचारलाई सहज बनाउन स्वास्थ्य सेवा कार्यालयले प्राथमिक स्वास्थ्य केन्द्र लिम्सालाई १० वटा अक्सिजन सिलिण्डर सहित आबश्यक औषधि दिएको हो ।
कोरोना सम्बन्धिको १० टराली औषधि र १० वटा अक्सिजन सिलिण्डर लिएर स्वास्थ्य सेवा कार्यालय, जाजरकोटका निमित्त व्यवस्थापक टीकाराम जैसी आफै सोमबार प्राथमिक स्वास्थ्य केन्द्र लिम्सामा पुगेका थिए । बारेकोटमा यतिवेला कोरोना संक्रमणको प्रभाव बढ्दो क्रममा रहेको जानकारी दिदै गाउँ स्वास्थ्य शाखाका संयोजक बीरराज सिंहले असहज अबस्थामा अक्सिजन सिलिण्डर सहित औषधि सहयोग गरेकोमा स्वास्थ्य सेवा कार्यालयलाई धन्यवाद दिएका छन् । जुम्ला र डोल्पाको सिमानासंग जोडिएको बारेकोट जिल्लाकै भौगलिक रुपमा बिकट गाउँपालिका भएको बताउदै स्वास्थ्य सेवा कार्यालयका निमित्त व्यवस्थापक जैसीले जिल्लाका सबै नागरिकहरुलाई स्वास्थ्य सुरक्षाको अनुभुति दिलाउन आफु अक्सिजन सिलिण्डर र औषधि सहित बारेकोट पुगेको बताए ।
स्वास्थ्य सेवा कार्यालयले सबै प्राथमिक स्वास्थ्य केन्द्र र स्वास्थ्य चौकीहरुलाई अविभावकत्व प्रदान गरिरहेको बताउदै प्राथमिक स्वास्थ्य केन्द्र लिम्सामा कार्यरत सिनियर अनमी कल्पना रोकायले जटिल अबस्थामा स्वास्थ्य सेवा कार्यालयका व्यवस्थापकको उपस्थितिले आफुहरुको आत्मबल बढेको बताईन् । स्वास्थ्य सेवा कार्यालयले प्राथमिक स्वास्थ्य केन्द्रलाई दिएको आबश्यक औषधि र अक्सिजन सिलिण्डरले स्वाथ्यकर्मीहरुको मात्र नभएर उपचारमा रहेका कोरोना संक्रमित बिरामीहरुको आत्मबललाई माथि उठाउने काम भएको अनमी रोकायको भनाई रहेको छ । स्वास्थ्य सेवा कार्यालयले १० वटा अक्सिजन सिलिण्डर दिएपछि लिम्सा प्राथमिक स्वास्थ्य केन्द्रमा २८ वटा अक्सिजन सिलिण्डर संख्या पुगेको छ । २८ वटा मध्ये ३ वटा सिलिण्डर खाली रहेका छन् भने, २ वटा प्रयोग भईरहेका छन् । अक्सिनजन सहितका २३ वटा सिलिण्डरलाई सुरक्षित तरिकाले स्टोर गरिएको प्राथमिक स्वास्थ्य केन्द्र लिम्साले जनाएको छ ।
