जाजरकोट
नलगाड नगरपालिका–४ लँह स्थित भानुभक्त माध्यामिक विद्यालयमा छैटौं नगर प्रमुख खेलकुद प्रतियोगिता–२०८१ उद्घाटन भएको छ । नगर प्रमुख डम्बर बहादुर रावतले बुधबार विधिवत रुपमा छैटौ नगर प्रमुख खेलकुद प्रतियोगिता–२०८१ को उद्घाटन गरेका हुन् ।
हरेक बर्ष नगर शिक्षा युवा तथा खेलकुद शाखाद्धारा आयोजना गरिने नगर प्रमुख खेलकुद प्रतियोगिता–२०८१ म नलगाड नगरपालिकाका १० वटै माध्यामिक विद्यालयले भाग लिएको नगर शिक्षा युवा तथा खेलकुद शाखा प्रमुख बलवीर विकले जानकारी दिएका छन् । भानुभक्त माध्यामिक विद्यालय नलगाड नगरपालिका–४ खालचौर खेल मैदानमा संचालन भएको छैटौं नगर प्रमुख खेलकुद प्रतियोगिता–२०८१ यही माघ २० गतेसम्म संचालन गरिने मुल आयोजक समारोह समितिले जनाएको छ ।
विभिन्न विदामा खेलकुद प्रतियोगिता संचालन गरिने नगर प्रमुख खेलकुद प्रतियोगिताको उद्घाटन सत्रमा प्रतियोगिता सफलताको शुभकामना नगर प्रमुख डम्बर बहादुर रावत, उपप्रमुख देवका लामिछाने, जिल्ला समन्वय समिति, जाजरकोटका पुर्व प्रमुख मन बहादुर रावल, नगर पुर्व प्रमुख टेक बहादुर रावल, नेपाली काँग्रेस जाजरकोटका सह–सचिव तथा प्रवक्ता छवी पन्त, वडा नं. ४ का वडा अध्यक्ष बद्री पन्त लगाएतका अन्य वडाका वडा अध्यक्षहरु, भानुभक्त मावि लँह व्यवस्थापन समितिका अध्यक्ष सुरेन्द्र बहादुर चन्द लगाएतका विव्यस अध्यक्ष तथा प्रअहरुले मन्तव्य राखेका थिए । नगर प्रमुख खेलकुद प्रतियोगिता उद्घाटन समारोहमा कतिपय विद्यालयका विद्यार्थीहरुले विभिन्न संस्कृतिक प्रस्तुतिहरु प्रस्तुत गरेका थिए ।
