सोमबारको जीप दुर्घटनामा परी ज्यान गुाउने १२ जनाप्रति छेडागाड नगरपालिकाले श्रद्धान्जली व्यक्त गरेको छ । मंगलबार एक शोक बक्तव्य जारी गर्दै नगरपालिकाले जीप दुर्घटनामा परी ज्यान गुमाउने १२ जनाप्रति श्रद्धान्जली अर्पण गरेको हो । दुखद घटनाबाट १२ जनाले ज्यान गुमाएको पीडाको क्षणमा नगरपालिकाले मंगलबार एक दिन सार्वजनिक सेवा प्रवाहलाई बन्द गर्ने घोषणा गरेको छ । नगरपालिका भित्र रहेका सम्पूर्ण सरकारी, नीजि तथा गैरसरकारी कार्यालयहरु मंगलबार बन्दगरी सेवा प्रवाहको कामलाई रोक्न शोक वक्तव्य मार्फत सबैलाई अनुरोध गरिएको छ ।
निमित्त प्रमुख प्रशासकीय अधिकृत गंग बहादुर रोकायद्धारा जारी गरिएको शोक वक्तव्यमा भनिएको छ–‘कहाली लाग्दो दुर्घटनाबाट अनाहकमा १२ जनाले ज्यान गुमाउनु परेको यस दुखद घटनाले छेडागाड नगरपालिकाको सम्पूर्ण परिवार स्तब्ध भएको छ । साथै यस दुखद दुर्घटनाबाट ज्यान गुमाउनु हुने सम्पूर्ण मृतआत्माहरुको चीरशान्तिको कामना गर्दै शोकाकुल परिवारजनप्रति गहिरो सम्वेदना प्रकट गर्दछौं ।’
छेडागाड नगरपालिका–४ र ५ को सिमाना स्थित भीरबाटीमा सोमबार कर्णाली प्रदेश ०२००१ च ०४२९ नम्बरको बोलेरो जीप दुर्घटनामा परेको थियो । बिरामी बोकेर उपचारको लागि थलह स्थित नगर अस्पताल तर्फ जादै गर्दा उक्त जीप भीरबाटीमा दुर्घटनामा परेको थियो । उक्त दुर्घटनामा परी ज्यान गुमाउनेहरुमा छेडागाड नगरपालिका–५ का जैकुरा वुढा, नैनसरा अधिकारी, राम बहादुर बुढा, निशा अधिकारी, दिपक अधिकारी, देवीसरा बुढा, अमर अधिकारी र जयमान अधिकारी रहेका छन भने, छेडागाड–६ का बीर बहादुर खत्री रहेका छन् । त्यसैगरी गाडी चालक दैलेख भगवतिमाई गाउँपालिका–२ का मान बहादुर रावत, सोही गाउँपालिका–३ का बीरेन्द्र केसी र अमर बहादुर खड्का सहित १२ जनाले उक्त दुर्घटनाबाट ज्यान गुमाउनेमा परेका छन् ।
